4.3 L’analisa dla perioda

Al eserzize fundamentel che n fej a scola per analisé la strutura sintatica dla periodes ti dijen analisa dla perioda. N tol ndalauter na perioda, per recunëscer la proposizions defrëntes cun chëles che la ie metuda adum y abinan ora si funzion y si liams.

Prim var: abiné ora i predicac

Te na perioda, coche savon, iel tan de proposizions tanc che ie i predicac. ­Messon perchël abiné ora dantaldut i predicac (per ejëmpl, i sotrissan):

Diego fova ruvà japé de streda y l fova zapà ite te curiera, te chëla ovel udù Paul che ti sautova do y l cherdova per l saludé.

Te chësta perioda iel sies predicac, perchël ons sies proposizions.

Segondo var: partì su la proposizions dla perioda

Do che n à abinà ora i predicac, muessen auzé ora la proposizions dla perioda (per ejëmpl, cun na rissa desbiech). Per fé chësc, muessen recunëscer ciun elemënc che se lieia a n predicat y ciuni a n auter. Lecordete che sce l ie conetifs (congiunzions, preposizions y n.i.) feji pert dla proposizions a chëles che i va danora, te cunsion de i auzé ora:

Diego fova ruvà japé de streda / y l fova zapà ite te curiera, / te chëla ovel udù Paul / che ti sautova do / y l cherdova / per l saludé.

Terzo var: recunëscer i liams danter la proposizions

Śën messons capì i liams che l ie danter la proposizions.

• Dantaldut messons crì la proposizion prinzipela, chël uel dì la frasa sintati- camënter autonoma che à n senificat cumpletà nce da sëula. Lecordete che la ne n’à nia na posizion for medema. Tl ejëmpl dessëura se tratel dla prima posizion:

Diego fova ruvà japé de streda

• Pona muessen abiné ora sce l ie coordinedes y subordinedes (spezifican l degré). I conetifs pieta indicazions n cont dla funzion dla proposizions de- frëntes. La segonda proposizion dl ejëmpl:

y l fova zapà ite te curiera

ie lieda ala prinzipela dala congiunzion y, che la concia ite sun l medemo livel dla prinzipela: perchël iel na si coordineda.

• La terza proposizion:

te chëla ovel udù Paul,

depënd diretamënter dala prinzipela, perchël iela na subordineda de 1. degré.

• La cuarta proposizion:

che ti sautova do

depënd dala terza proposizion, perchël iela na subordineda de 2. degré.

• La cuinta proposizion:

y l cherdova

ie sun l medemo livel dla cuarta proposizion subordineda tres la congiunzion y, perchël iela na si coordineda; nce chësta ie perchël na subordineda de 2. degré.

• La sesta proposizion:

per l saludé.

depënd dala cuinta proposizion y perchël iela na subordineda de 3. degré.

Cuarto var: recunëscer de ce sort che uni proposizion ie

Ala fin muessen mustré su la funzion spezifica de uni proposizion, ti dajan a uniuna si inuem.

Tl ejëmpl che on purtà dant, ie la prima frasa na prinzipela de nunziazion; la segonda ie na coordineda copulativa; la terza, la cuarta y la cuinta ie subordinedes esplizites (n les recunësc dai verbs de modus finà); la sesta ie na subordineda implizita (verb de modus indefinit).

L’analisa dla perioda possa unì reprejenteda te de plu manieres. Tlo ti jons do a una che mostra su miec i liams, davia che l ie la reprejentazion grafica dla strutura de na perioda. Sce se nuzon a puntin de chësc sistem possel nes judé, nia mé a capì miec frases longes y cumplesses che lijon ti libri, ma nce a scrì miec:

Diego fova ruva japé de streda / y l fova zapà ite te curiera / te chëla ovel udù Paul / che ti sautova do / y l cherdova / per l saludé.

Te chësc ejëmpl ons la prinzipela y si coordineda, che tol ite n valguna subordinedes una dependënta dal’autra. La strutura cëla ora nsci:

Te chësc schema ie i liams de coordinazion reprejentei orizontei, chëi de subordinazion vertichei; perchël saral for na coordineda a man drëta dla frasa che la tën su; la subordineda, ntant sce, sarà for sota la frasa da chëla che la depënd.

Sce la proposizions unissa partides su autramënter:

Te chëla che l ova udù Paul / che ti sautova do / per l saludé /
fova Diego ruvà japé de streda / y l fova zapà ite te curiera

tumëssa l schema ora l medemo, ajache chëla che vën reprejenteda ie la strutura sintatica dla perioda.

L possa unì dant na prinzipela che sustën doi subordinedes coordinedes danter ëiles.

Richard ova udù Klaus

prinzipela

che ti sautova do

subordineda espl. 1. degré relativa

y svaiova.

subordineda coordineda ala subordineda

Dala prinzipela possel depënder doi subordinedes dl medemo livel, ma nia liedes danter ëiles.

Klaus fova sautà dut a sparon

prinzipela

ajache l ova udù Richard

subordineda impl. 1. degré de gauja

per jì a l pië.

subordineda impl. 1. degré de fin

L possa unì dant doi subordinedes dl medemo degré nia liedes danter ëiles, ma la prima depënd dala prinzipela, la segonda dala coordineda ala prinzipela.

Richard fova tl lëur de zapé ite te curiera

prinzipela

per jì a cësa

subordineda impl. 1. degré finela

ma l ova udù Klaus

coordineda copulativa

che ti sautova do.

subordineda espl. 1. degré relativa

L ie caji te chëi che la prinzipela ne n’à nia n senificat cumpletà zënza la subordineda, che tol ite la funzion feter unfat a chëla de n cumplemënt oget. Te chisc caji ie la subordineda n cumplemënt che ie de bujën per la strutura dla frasa rejënta. Pudon mustré su chësc nsci:

Richard (ti) ova dit a Klaus

prinzipela

che l sautova propi bën.

subordineda espl. 1. degré ogetiva