a cura di Marco Forni

I sënies de interpunzion

L’interpunzion ie i sënies de chëi che se nuzon per segmenté n test scrit y fé a na maniera che l sibe da capì.
La normes che à da nfé cun ponc y virgules ie mé n pert codifichedes tl ladin. Desferenzion danter chisc sënies interpuntifs:

l pont ( . )
l sëni de dumanda ( ? )
l sëni d’estlamazion ( ! )
la virgula o coma ( , )
l pont y virgula ( ; )
i doi ponc ( : )
i trëi ponc ( ... )
la virgulëtes (spizes: « », autes: “ ”, scëmples: ‘ ’)
la rissa ( -, – )
la parenteses turondes ( )
la parenteses chedres [ ]
la rissa desbiech ( / )
la stëila o asterisch ( * )


L sëni interpuntif fundamentel ie l pont. L vën adurvà per mustré na paussa plu longia, che stluj na perioda o nce na frasa. L pont vën nce adurvà tla scurtedes: dut. (= dutor), sen. (= seniëur).
I doi ponc vën adurvei per : spieghé, desmustré, indiché la cunseguënzes de chël che vën dit dant. I vën nce nuzei per nvië via na elencazion o n descurs diret.
L pont y virgula ons canche danter doi frases iel na majera paussa ; purempò chël che vën dit do l pont y virgula ie scialdi lià a chël che vën dit dant. Per chësc liam strënt ne fossa l pont nia adatà.