2.8 La congiunzion


I libri ie fac per i tò tla man, nce tl liet, nce sce n sta decà a aspité la curiera o la ferata. I possa unì sotrissei y danter la plates po­ssen mëter n sënialiber. N possa i scinché o i lascé sun n banch. I possa tumé via per fonz, canche n se ndurmënza sun canape. Pudon platerné laite y i nes lecorda, sce i ie massa nueves y lucënc che on mo da i liejer. L liber ie una de chëla marueies eternes, de chëles che fej pert la roda, l curtel, la sciadon, l martel, la fana. Ma per tan che la tecnologia cëla de mudé si cialé ora cun l e-book, la sustanza dl liber resta for chëla.

La paroles auzedes ora tl test a cueciun ie congiunzions. Scebën che les sibe paroles uetes, chël uel dì zënza n referënt, sce n les tulëssa demez fossa l test deslià. La congiunzions, nfati, coche la preposizions à la funzion de conetifs; l ie chëla paroles che à la funzion de lië adum la pertes defrëntes de n test. La congiunzion à la funzion de lië frases, paroles o grupes de paroles. La possa, perchël, lië paroles de na frasa o frases de na perioda, purtan pro ala strutura logica dl descurs, che ie nsci tlera y da capì.


La congiunzions ie paroles nia mudëntes che ie de bujën per lië elemënc de na proposizion:

Erika y Sonia o proposizions: Lieje y scrije.


Dal pont de ududa dla forma desferenzions:

    la congiunzions scëmples, furmedes da una na parola: y, ma, no, coche, perchël y n.i.
    la congiunzions cumpostes, furmedes da doi o da de plu paroles scrites adum: daviadechël, depona, purempò y n.i.
    la locuzions congiuntives, grupes de doi o de de plu paroles che à la medema funzion de na congiunzion: dal mumënt che, davia che, do che, scebën che y n.i.

Dal pont de ududa dla funzion desferenzions:

    la congiunzions coordinëntes, che lieia elemënc che à l medem valor tla frasa o tla perioda: É cumprà na chëutra mujela y ciauda.
    la congiunzions subordinëntes, che nvieia via n liam de subordinazion danter doi proposizions: L é cherdà su, ajache ne l é nia plu audì.

2.8.1 La congiunzions coordinëntes

La congiunzions y locuzions congiuntives coordinëntes, o coordinatives, lieia elemënc cun l medem valor o cun na funzion sintatica feter unfat. Les possa lië:

  • pertes dl descurs che se curespuend te na frasa, coche doi inuemes, doi verbs, doi agetifs y n.i.:

Rita y Monika se ujina.

Ne son nia bon de capì sce te ies stanch o dalascemesté.

  • proposizions che te na perioda à l medem valor sintatich:

Ionas ciantova y Marion sunova.

L dirighent ulova che Ionas ciantëssa y che Marion sunëssa.

Aldò de ce sort de liamënt che les nvieia via, desferenzions sies sortes de congiunzions y locuzions congiuntives coordinëntes: copulatives, deslientes, aversatives, corelatives, de cuntlujion y esplicatives.


2.8.2 La congiunzions copulatives

La congiunzions (coordinëntes) copulatives mostra su n liam de “soma” scëmpla y se desferenzieia danter afermatives y negatives.

  • La copulativa afermativa ie y:

Dame na sciadon y na furchëta.

  • La copulativa negativa ie no:

Ne ue no cërn no pësc.

Ënghe, nce, leprò, mplu y nianca vën cunscidredes congiunzions copulatives, positives o negatives, cun na funzion sëuraprò de njonta permez ala congiun­zion y:

La à butà y nce i pesimënc ie a una.

Ne ti l’é nia fat al savëi a Diego y nianca a Claudia.


2.8.3 La congiunzions deslientes, aversatives y corelatives

  • La congiunzions (coordinëntes) deslientes, coordinea doi elemënc dla proposizion o dla perioda che se stluj ora l un cun l auter. La plu adurvedes ie o y scenó.

Ues’a n mëil o n pëir?

Spazete, scenó ruveres tert.

  • La congiunzions (coordinëntes) aversatives lieia doi paroles o doi proposizions les metan n pert n contraposizion (l ie tert, ma ne n’é nia suenn) o dl dut n contraposizion (l ne svanidlova nia per la suenn, ma per la fam).

I riji fova boni, ma n pue’ massa cuec.

Chëi fonc ne fova nia boni, ma da tuesse.

Coche n vëija da chisc ejëmpli, possa la congiunzion ma dé esprescion a tramedoi valores; mplu possela unì adurveda per cumedé o renfurzé (Silvia ne n’ie nia blòta, ma bela. Ma ce legrëza!). Ma possa nce unì dant al scumenciamënt de na perioda per mudé argumënt o l tò su da nuef (Ma rujenon (ma) de vel’ d’auter...; Ma jon ma inant...).

Na dumanda che n pudëssa se fé, ie sce n possa propi scumencé na frasa cun ma.

Sce ancunton nosc cumpani Peter nzaul ulache nes assan mei aspità de l udëi, bonamënter dijons:

Ma cie fejes’a tu tlo?

Ie pa chësc n fal? Plu da giut univel dit de sci, ma al didancuei ne n’iela nia plu nsci; cun l tëmp se à nravisà ite nce chësta forma per scumencé na frasa. Co ie pa chësc da spieghé?

L se spiega cun l pensier sotntendù: “Tu Peter mësseses pu vester nzaul d’auter y ne vester nia tlo, ajache te stes o te lëures n valgon d’auter.” Ma à perchël purempò n cie zeche, n pensier che va danora: l ie sotntendù, nce sce l ne vën nia dit ora.

  • La congiunzions (coordinëntes) corelatives, metudes adum cun doi elemënc, vën adurvedes per auzé ora na relazion: l un cun l auter, danter doi paroles o doi frases coche: nia mé... ma nce..., sibe... che...

Nia mé stlet, ma nce cëre.

Sibe Georg che Leo va a scola cun la roda.


2.8.4 La coordinëntes de cuntlujion y esplicatives

La congiunzions de cuntlujion lieia doi paroles o doi frases; la segonda dà esprescion ala cunseguënza o cuntlujion dla prima.

La congiunzion plu adurveda ie perchël.

Alexander à massa ciaut, perchël se n iel jit a dumbria.

L ie nibl n tiera, perchël ei dat ëuta.

La congiunzions esplicatives (o detlaratives) ie dan na parola o na frasa che spie­ga chël che ie bele unì dit. La locuzions plu adurvedes ie: miec dit y chël uel dì.

Ëila pierà via doduman, miec dit n juebia.

La ti à sciacà, chël uel dì che l ne n’ie nia passà.


2.8.5 La congiunzions subordinëntes

La congiunzions y la locuzions congiuntives subordinëntes o subordinatives lieia doi proposizions, fajan dainora n liam de subordinazion, a na maniera che da una de chëstes, la rejënta, depënde l’autra, la subordineda.

Elfriede à mpermetù che la se purverà de plu a scola.

rejënta subordineda

L ancunteré doduman davia che duman ne jirei nia a scola.

rejënta subordineda

La congiunzions subordinëntes lieia adum proposizions de n auter livel sinta- tich y ie chëstes:

che, sce, ntan che, dan che, do che, pernanche, nchin che, acioche,

ajache, scebën che, nsci che, tant che, plu che, manco che, sciche sce,

coche, canche, zënza che.

L ie congiunzions subordinëntes che n possa giamië cun paroles che à funzion de averb o de preposizion y che ie medemes tla forma. Per les desferenzië, le- cordete che chësta paroles:

  • ie averbs canche les muda n verb o n’autra pert dl descurs, ma ne fej nia dainora n cunliamënt;
  • ie preposizions canche les sustën n inuem o n pronom;
  • ie congiunzions canche les lieia elemënc te na frasa o te doi frases.

Son stanch y nce dessenà (congiunzion: lieia doi agetifs).

Nes udon do (averb: muda n verb).

Nes udon do l lëur (preposizion: sustën n inuem y ie lieda a n
cumplemënt: do l lëur).

Maieré do avëi mparà (congiunzion: sustën n verb y ie danora a na
subordineda).

Congiunzions subordinëntes

Funzions

Ejëmpli

che

detlarativa

de gauja

finela

temporela

consecutiva

comparativa

ezetuativa

Te dije che l ie tert.

Spazete che l ie tert.

Lascetil al savëi che l se njënie ca.

Leve che l ie mo scur.

L fova tan stanch che l ne n’à nianca cenà.

L ie miec ruvé dant che aspité ca.

L ne pënsa nia a vel’ d’auter che sparanië.

coche

modela

detlarativa

comparativa

interogativa indireta

É fat la tëurta coche te me es cunsià.

L se ova fat marueia coche duc scutova su.

L ne n’ie nia tan frëit coche pensove.

Duc se damanda coche l ebe fat.

sce

condizionela

interogativa indireta

Sce pudësse, unissi nce ie.

Ne sé nia sce l abineré per tëmp y ëura.

ajache

de gauja

finela

L ie restà a cësa ajache l à fiëura.

Ti l é fat al savëi ajache i sebe coche la jirà a finé.

canche

temporela

Uniré canche aré finà de mparé.

ciuldì che

interogativa indireta

Ulësse savëi ciuldì che l se cumporta nsci.

ntan che

temporela

Scote su mujiga ntan che lëure.


2.8.6 La congiunzion che

Che possa avëi la funzion de pronom relatif (mi nëine ie chël berba che udëis cavia) ma nce chëla de congiunzion. L va danora ala frases dependëntes coche la cumpletives, che fej da soget o da argumënt dl verb:

L ne n’ie nia drët che te stes decà zënza fé nia.

L à dit che l ne se la sënt nia.

L ne se rënd nia cont che l fej dl mel a si oma.

La cumpletiva ie na proposizion subordineda che à la funzion de soget o de cumplemënt diret o de aposizion dla rejënta:

L ie bel che te sibes inò tlo.

La proposizions ogetives, sogetives y interogatives indiretes vën nce tlassifi­chedes coche cumpletives ajache les ie l cumpletamënt che va de bujën per la proposizion rejënta.

Che possa nce jì danora a subordinedes d’uni sort:

Cëla che l ne tome nia (finela).

Maia che la se desfrëida (de gauja).

L ie ruvà che l fova bele tert (temporela).


2.8.7 La congiunzion subordinëntes plu mpurtantes

  • Detlaratives: cumpletea l senificat dla proposizion rejënta: che.

L à mpermetù che l scumencerà a lauré.

L te cunvën che te proves de plu.

Chësta fova si minonga che degun fova bon de azeté.

  • Interogatives: gëura proposizions che dà esprescion a na dumanda nia dire- ta: sce, canche.

Damandeti sce l à finà y coche l à fat.

Ulësse savëi canche te jires a cësa.

  • De gauja: auza ora la rejon ciuldì che l ie suzedù l’azion che vën dant tla rejënta: ajache, davia che, dal mumënt che.

Reste a cësa, ajache muesse mparé.

Davia che ne n’é mo nia finà, ne possi nia me n jì.

Dal mumënt che te la vëijes nsci, ne n’ons plu nia da nes dì.

  • Fineles: auza ora l fin, per chël che l vën a se l dé l’azion dla rejënta: acioche, nsci che, a na maniera che, a na moda che.

Dil plu tler, acioche duc te ntënde.

Scrì miec, a na maniera che te sibes bon de liejer.

  • Consecutives: dà esprescion ala cunseguënza dl’azion che vën dant tla rejënta; suvënz vëniel dant danora n elemënt tla rejënta: (nsci) ... che, (tan) ... che.

L rujenova tan achiet che deguni ne l ntendova.

  • Condizioneles: auza ora la condizion che vën metuda dant ajache l vënie a se l dé l’azion dla rejënta: sce, tantosc che, sce mei che.

Sce la me fossa jita ora, fossi unit.

Tantosc che me spaze, sons bon de ruvé per tëmp y ëura.

  • Cunzessives: dà esprescion a na condizion che ie de mpaz, ma purempò iesen boni de arjonjer l resultat de chël che l vën rujenà tla rejënta: scebën che, nce sce.

Scebën che l fova stanch, ovel finà per tëmp y ëura.

Zeche messerala maië, nce sce la ne n’à nia fam.

  • Temporeles: auza ora l tëmp, te chël che l vën a se l dé la azion dla rejënta: canche, ntant che, dan che, do che, nchin che, uni iede che.

Canche l fova ruvà, ne fovel mo deguni.

Te messësses jì plu suvënz cun i schi, uni iede che te es manco da fé.

  • Aversatives: les va danora a proposizions che porta a na relazion de cuntrast cun la rejënta: ntant sce.

I mëiles ie frësc, i pëires ntant sce ie frec.

  • Comparatives: les va danora a proposizions che auza ora n cunfront cun chël che vën dit tla rejënta: tant che.

L ie tan bon de cianté tant che de suné.

É abù bujën de plu tëmp de tant che ësse minà.

  • De maniera: les va danora a proposizions che dà esprescion ala maniera de coche l vën a se l dé chël che vën dit tla rejënta: coche, sciche sce, belau che.

Fajëde l lëur coche l ve ie unì spiegà.

L à respundù giut do, sciche sce l ne ëssa nia ulù dé audida.

  • De estlujion: les dà esprescion a na estlujion o al nia unì a se l dé de na situa­zion: zënza che.

L se n fova jit zënza che zachei l ësse udù.

  • Ezetuatives: les va danora a proposizions che ncertlea ite l cunzet che vën dit dala rejënta: auter che sce.

Te juderé, auter che sce ne te ares nia bele finà l lëur.

  • Limitatives: les va danora a proposizions che ncertlea ite na minonga n cont de chël che vën dit dala rejënta: per chël che, aldò de chël che.

Per chël che sé, se la cavel bëndebò bën a scola.

L ie n roman da plajëi, aldò de chël che me ie unì dit.

Eserzizies

Cuncé ite la drëta congiunzion.
Rita Monika se ujina.
I riji fova boni, n pue’ massa cuec.
Ne ue cërn pësc.
cie fejes’a tu tlo?
Elfriede à mpermetù la se purverà de plu a scola.
Alexander à massa ciaut, se n iel jit a dumbria.
L à dit l ne se la sënt nia.
 
cialé do soluzions